بمناسبة عيد المعلم ..جمل بيقولوها كل الأساتذة بلبنان
مين منا ما بيتذكر إستاذه ومعلمته بالمدرسة لي طبعوا صورة يمكن حلوة كتير ويمكن لاء بس أكيد كلنا منحنّ لإيام المدرسة ولكل شي كنا نسمعه بالمدرسة.
شوفوا هل جمل لي بيقولوها كل الأساتذة بلبنان.
1. عندي عيون ورا ضهري بقشع كل شي.
2. ليش عم تضحكوا؟ ضحكونا معكن.
3. شو كنا عم نشرح آخر شي؟ وين وقفنا؟ فانيسا كفي.
4. مين بدو يقرا عصوت عالي؟ ما حدا؟ أنا رح نقي على ذوقي لكن.
5. من هلأ ورايح بدي إتبع أسلوب تاني معكن لأن ما خرجكن لواحد يكون منيح معكن!
6. وين الفرض؟ ما حدا عمل شي؟ أنا مش قلت كلنا بدنا نعملو؟
7. أنا دقيت لأهلكن. رح إجتمع فيهن وشوف آخرتها معكن…
8. شو يعني مش فاهمين شي؟ أنا لمين كنت عم إشرح مبارح؟
9. يلا مين بدو يطلع عاللوح؟
10. ماحدا يسألني عن الإمتحانات ما فضيت صلحهن.
11. من بكرا رح بلش شيل علامات لكل حدا ما بيعمل فرضه.
12. انتبهوا على الشرح بالصف رج يجي بالفحوصات قصص شرحتها بالصف ومش موجودة بالكتاب.
13. رح خبر المديرة بكل شي عم بصير بالصف.
14. أنا رايحة وراجعة، إذا بسمع حس بس إجي رح نقص علامات لكل الصف.
15. إي ضحكوا بدي شوف بكرا بوقت الفحوصات شو رح تعملوا.
16. ما تفكروا أنا بنسى شو عملتوا كل شي مسجل على الagenda.
17. إذا بعد بسمع حكي رح آخد 10 دقايق من الفرصة.
18. ما تفكروا حالكن عم تتذاكوا، العصفورة (الجاسوس) خبرتني كل شي حكيتوا عني بغيابي.
19. هاي آخر مرا بشرح، تبقوا شوفوا الكتب لحالكن.
20. صرلي 10 سنين بعلم ولا مرة قطع معي هيك صف.
21. روحوا شوفوا غير صفوف كيف بيتصرفوا، يا عيب الشوم.
22. قعدوا منيح، إنتو قاعدين بالصف مش بالبيت.
23. هلق إنت خيك طارق؟ خيك كان شاطر، يا ريت طلعت متلو.
24. أنا رح ضل ساكتة، خبروني بس تخلصوا حكي.
