رسالة من الأب بيتر حنا ل نضال الأحمدية !
كتب الأب بيتر حنا على صفحته على فيسبوك :
بونجور للشعب السوري،
شعب مكافح وبطل وخلوق،
شعب الكرم والمحبة والإيمان،
شعب ظلمتو الحياة وعم تحاربو وين ما راح،
ورغم هيك بعدو بآمن بالحياة وبحب من قلبو،
شعب فقرتو الحياة، بس بعدو غني،
جوعتو الحياة، بس بعدو شبعان،
شعب شردتو الحياة، ولكن بعدو ابن أصل،
شعب الأدب والشعر والفن والمسرح،
شعب صباح فخري وفريد الأطرش وأسمهان وجورج وسوف والياس كرم وشادي جميل وميادة الحناوي وناصيف زيتون وفايا يونان وغيرن كتار..
شعب دريد لحام وحسني البورظان ورفيق سبيعي، شعب أيمن زيدان وأيمن رضا وباسم ياخور وجرجس جبارة ومنى واصف وأمل عرفة وشكران مرتجى وباسل خياط وتيم حسن ومعتصم النهار وكتار غيرن..
شعب الحضارة.. شعب نزار قباني..
شعب دمشق أقدم مدينة مأهولة بالعالم،
شعب طريق الشام محل اهتداء مار بولس، رسول الأمم..
شعب القديسين اللي عطانا مار مارون والقديس أغناطيوس ويوحنا الدمشقي وأفرام السرياني وسمعان العمودي وإليان الحمصي وغيرن..
شعب عطا كتير وبعدو،
شعب مش بحاجة لشهادتك ست نضال الأحمدية،
شعب هوي موزع شهاداتو على كل الدني..
الأب بيتر حنا
